|
Иргэнээ дэмжиж, өрх гэрээ тэтгэе, үйлдвэрлэлээ өргөжүүлж
эх нутгаа хөгжүүлье
Миний бие Сэлэнгэ сайхан нутгийнхаа хөгжлийн төлөө ирэх 4 жилд хийх үйл ажиллагааны хөтөлбөр, бодлого, зорилтоо хамтын оюун ухаанаар шүүн хэлэлцэж, боловсруулан бэлэн болголоо.
Энэхүү хөтөлбөр нь Сэлэнгэ аймгийг 2021 он хүртэл хөгжүүлэх хөгжлийн хөтөлбөрөөр чиглэлээ хийж, хөгжлийн явцын давуу болоод сул тал, нийгэм эдийн засгийн хүчин чадалд тулгуурлан өнөөгийн иргэн, айл өрхөд тулгамдаж буй асуудлыг шийдвэрлэхэд шууд чиглэсэн, шинээр бий болгох, бүтээхэд түлхүү хандсанаараа онцлог болсон гэж хэлж болно.
Тус аймгаас УИХ-д сонгогдсон эрхэм гишүүд, орон нутгийн сонгуульд нэр дэвшигчид, сонгогдсон төлөөлөгчид, сонгуульд оролцсон намууд, төрийн болон төрийн бус байгууллага, аж ахуйн нэгж, иргэдийн 1300 гаруй санал хүлээн авч, ирсэн ажил хэрэгч олон санал санаачлагуудыг нягтлан судалж, тооцоолж, нэгтгэн дүгнэж, хөтөлбөртөө тусгалаа.
Аймгийн Засаг даргын бүрэн эрхийн хугацааны үйл ажиллагааны хөтөлбөрөө 3 бүлэг, 13 дэд бүлэг нийт 169 бодлогын зорилттойгоор боловсруулсан. Аймгийн Засаг даргын бүрэн эрхийн хугацааны үйл ажиллагааны гол зорилгоо “Иргэнээ дэмжиж, өрх гэрээ тэтгэе, үйлдвэрлэлээ өргөжүүлж, эх нутгаа хөгжүүлье” хэмээн тодорхойлж байна.
Аймаг, орон нутгийн хөгжлийн алсын чиг баримжаанд тулгуурласан, шинжлэх ухаан, техник технологийн дэвшлийг эрхэмлэн, шинэ бүтээлч ажил үйлс, үр дүнгээр иргэд айл өрхийн амьдрал, аймгийн хөгжилд сайн нөлөө үзүүлэхийг зорьсон энэхүү хөтөлбөрөө бодитой үр дүнд хүрнэ гэдэгт итгэл дүүрэн байна.
Энэхүү хөтөлбөрт дэвшүүлсэн зорилтууд нь Сэлэнгэчүүд биднээс хөгжлийн богино агшинд ихээхэн санаачлага, эв эеийн сэтгэл зүтгэл, хүч оролцоо, хөрөнгө санхүү шаардсан шахуу, харилцан уялдаа, шүтэлцээтэй болсон гэдгийг онцлон хэлмээр байна.
Сэлэнгэ нутгийнхаа ирээдүйн хөгжилд хамтын оюун ухаан, бүтээлч шаргуу хөдөлмөрөө зориулцгаая !
Сэлэнгэ аймгийн Засаг
дарга
Ж.Эрдэнэбат
|
